آزر مراد
دنیا ءِ راجدپتر ءِ تہاچُشیں بازیں آشوبی دور گندگ بیت کہ چہ گلامی، زلم، حق جنی ءُاستحصال ءِ سوب ءَ وجود ءَ اتکگ اَنت ءُ ھمے استحصال ءِ ھلاسی ءِ ھاترءَ جنگ اِش داتگ۔ فکشنل دنیا ءِ تہا’’پروموتھیس‘‘ آ اولی کردار اِنت کہ پہ بنی آدمانی حق جنی ءِ سوب ءَ دیوتایانی ھلاپ ءَ رؤت ءُ آس ءَ پہ دنیا ءَ سرکنت ءُ ھمے آشوبی کار ءِ سوب ءَ دیوتایانی گلاس نہ بیوکیں’’ کہر‘‘ءِ آماچ بیت۔ پروموتھیس یک فکشنل کردارے بلئے ھما گپ کہ اے کردار ءِ کسہ ءَ گوں ھمگرنچ انت ءُ پہ بنی آدماں یک درورے ءِ ھساب ءَ کار دنت آ ایش اِنت کہ دیوتایانی بنی آدماں چہ زانت ءُزانگ ءَ دیر دارگ ءِھما واہگ کہ ھست اِنت آ واہگ پہ بنی آدماں زلم ءِ ءُ پہ آیاں یک استحصالےءِ دْروشم ءَ چارگ بیت ءُ پروموتھیس ھمے استحصالءُ حق جنیءِ ھلاپءَ دیوتایانی دیما اوشتیت ءُ آسءَ چہ آزمانءَ زمینءَ سرکنت۔ راجدپترءِ تہا چشیں بازیں بامردانی نام ھوار اَنت کہ پہ ھکءَ ءُ استحصالءِھلاپءَ جنگ ئِے بندات کتگ ءُ آشوب ئِے آؤرتگ۔ ھمے پئیمیں یک آشوبی جنزے منی نزیکءَ فیمینزم اِنت۔ بیت کہ باز مردم فیمینزمءَ چشیں ٹوہیں آشوبے سرپد مہ بیت کہ من برز ءَ داتگ بلئے پہ من فیمینزمءِ جنز ایدگہ جنزءَ چے تُشے ھم کمتر نہ بوتگ، پرچاکہ اے جنزءِ بندات ھم پہ حق ءُاستحصالءُ گلامیءَ چہ آجوئیءِ ھاترءَ بندات بوتگ۔ فیمینزم چناہا یک فلسفیانہ ڈیسکورسے بلئے یک انچیں ڈسکورسے کہ آئیءِ چاگردی رنگ بازیں فیمینسٹ زانتکاراں چاگردانی تہا ھوار گیتکگ اَنتءُ آشوبءِشکل دیما آؤرتگ اَنت۔ جرمن جنینے ءَگشتگ اَت کہ ’’منی راجدپتری کتاب دروگ بند اَنت، آ گش اَنت کہ منی وجود نیست اَنت‘‘۔ آ زالءَ اے گپ ھمے ھاترءَ جتگ اَت کہ دنیاءِ راجدپترءِ نبشتہ کنوک مدام مردین بیتگ اَنت، مردینءَ مدام راجدپتر وتی میراس کتگ ءُ نبشتہ کتگ۔ ھمے سوبءَ دنیاءِ راجدپتر مردین ءِ راجدپتر انت، زالبُول ءِ نہ اِنت۔ اگا ں ھیرت چاری کنگ بہ بیت تہ اے گپ پدر بیت کہ بنی آدم ءِ چاگردی دیمروئی ءِ ھاترءَ آ کردار کہ زالبول ءَ پیش داشتگ آ مردین ءِ کردار ءَ چہ گیشتر بیت، بلئے کمتر نہ بیت
دلگوش اے نبشتانک بلوچ وومن فورم ءِ تاک “برمش” ءَ چہ زورگ بوتگ
جہل ءِ داتگیں لنک ءَ چہ شمارا سرجمیں نبشتانک پی ڈی ایف ءَ دست کپیت
