اداریہ
میان اُستمانی تک ءَ ھر سال اے روچ زالبولانی روچ ءِ درگت ءَ زانگ ءُ برجم دارگ بیت، چی ءَ کہ اے روچ زالبولانی جھد ءُ جپّا، داتگیں دیمونیانی گیر آرگ ءِ روچ اِنت، بلے اے روچ میان اُستمانی تلو ءَ ھما روچ ءَ دیم ءَ کئیت کہ28 پروری 1908 یا 1909 ءَ ماں نیویارک ءَ جپّاکشّیں زالبولانی جُنزے سرکشّ اِیت۔ ھمے جُنز ءِ سرکشّگ ءُ توانگر بوگ ءَ پد اے توار تانسریں جھان ءِ تھتگاں جکس اِیت ءُ ھر بنی آدم ءِ گُوشاں کپ اِیت، ھمے گْوانک ءُ توار، ھمے جُنز ءُ جمبوکیں زْرمبشت ءِ برورد ءَ 1910 ءَ کوپن ھیگن ءَ سوشلسٹ انڑنیشنل کانپرنس ءِ دوران ءَ زالبولانی میان اُستمانی روچ ءِ برجم دارگ ءِ ھاتر ءَ شور ءُ سلاہ دیم ءَ کئیت۔ ھمے جھدانی دْرچ ءِ سبب ءَ اے توانمندیں توار پْراہ ءُ شاھگان بیت ءُ ھر بودناکیں بالادانی ھیال ءُ دلگوش ءِ گْور کنگ ءَ سوبین بیت۔
وھدے اے جکسوکیں گْوانک ءُ توار کہ تانسریں جھان ءَ سر ءَ زور اِیت، گُڑا 1977 ءَ راجانی ھم سنتیں ادارہ اکوام متھدہ (اقوام متحدہ) دلجمیں منّانکانی رِد ءَ اے روچ (8 مارچ) ءَ زالبولانی میان اُستمانی روچ ءِ درگت ءَ منّ اِیت ءُ رواج گیپت۔ چوش کہ اے روچ ءِ منّگ ءِ مول ءُ مراد ھمیش اِنت کہ زالبول ھم مردین آدم ءِ وڑ ءَ مُلکی کانود ءُ رھبند ءِ رِد ءَ وتی آجو ءُ آسودگیں زند ءِ گْوازینگ ءَ وتواک اِنت، بلے بلوچ زالبولانی جاور ءُ اِستان ءِ رویشت ھچ رنگ ءَ ھمدپ نہ اَنت۔ مرچی بلوچ زالبول چہ مُلکی کانود ءَ در کجام نگیگیں جاورانی دیمپان اَنت، اے ھبر اِستان ءِ اندر ءَ ھر جاہ منندیں بنی آدم ءِ دیم ءَ چو روچ ءَ پدّر اِنت۔ اِشی ءِ مستریں منّانک ھمیش اِنت کہ بلوچ زالبول وتی راست ءُ تچکیں توار جَنگ ءِ پُژدر ءَ زندان ءِ تھاریں کوٹیاں بندیگ ءُ چہ اِنسانی ھر ھمُک ھکّ ءُ آسراتی ءَ زِبھر ءُ پُشت ءَ چگل دَیگ بوتگ۔ اے پدمنتگی پہ زورانسری بلوچ زالبول ءِ سر ءَ مُشگ بوتگ ءُ بوگ ءَ اِنت، پرچا کہ بلوچ زالبول ءِ سیادی گوں ایردستیں راجے ءَ اِنت، ھمے ایردستی آئی گُٹ ءَ لوپ ءُ ھر رھسر ءِ ڈنگر اِنت۔
چوش کہ اے روچ (8 مارچ) جھان ءِ ھر ھمُک کُنڈ ءُ پلو ءَ پہ شادھی برجم دارگ ءُ وشی درشان کنگ بیت، بلے بلوچ زالبول اے روچ ءَ روچ ء مروچی ھم پہ وتی اِنسانی ھکّانی پھریزگ ءِ ھاتر ءَ برجم دارگ ءَ اِنت کہ مارا اِستانی رھبند ءُ کانود ءِ رِد ءَ ھما ھکّ ءُ آجوئی دَیگ بہ بیت کہ جھان ءِ ایدگہ شرپداریں راج ءِ زالبول پہ شرپ پُراِیمن ءُ آسودگیں زندے گْوازینگ ءَ اَنت۔
بلے!
پدمنتگ ءُ پُشت ءَ چگل داتگیں بلوچ زالبول چرے اِیمنیں چاگرد ءَ زِبھر ءُ انگت پہ زورانسری زِبھر کنگ ءِ کاربوج کار گِرگ بوگ ءَ اَنت، چی ءَ کہ اِستان نہ لوٹ اِیت بلوچ زالبول وتواک ءُ آسودگیں زندمان ءُ لسّھیں چاگردے ءِ ھُدابُند بہ بیت، بلے مارا بے تاگت ءُ وتی جھد ءِ کاروان نیمراہ ءَ یلہ کنگی نہ اِنت۔ پرچا کہ جھد کنوکیں راھی یک روچے الم وتی منزل ءَ سر بیت، مارا گوں ھمے اُمیت ءُ جوزگ ءَ جُنزگی اِنت دانکہ آیوکیں راجی اُوبادگانی شِگانے مئے کوپگاں مہ بیت۔
بلکیں ما ھر سال اے روچ (8 مارچ) ءَ گوں ھمے سِتک ءُ باور ءَ برجم بدار اِیں کہ وتی ھکّ ءُ اُکبالانی پچگِرگ ءَ سوبمند بہ اِیں، گُڑا الم یک روچے ھما سلّھیں چاگرد ءَ برجمینیں کہ بلوچ زالبول پہ شرپ وتواکیں زندمانے ءِ واھُند بیت۔
بیا اِت گوں ھم پتی ءَ اے روچ ءِ درگت ءَ اھد کنیں دانکہ مئے باتِن ءَ چنچو توان ءُ ھاٹیگ ھست اے منزل ءِ آسر کنگ مئے ڈُبّہ ءُ زمہ واری اِنت۔ اگاں ما پہ سدک ءُ یکدل وتی اے جھد ءِ کاروان ءِ مھکم ءُ دیم ءِ جُنزینگ ءَ ھر سھت ءُ دمان ساڑی بوت اِیں، گُڑا پہ جزم اے زورانسری ودی کُرتگیں تپاوت، پَرک ءُ پیر مئے مْیان ءَ ھچ رنگ ءَ پشت نہ کپ اِیت۔
چی ءَ کہ اے تپاوت، پَرک ءُ پیر ءِ ھلاس کنگ ءِ ڈُبّہ مئے کوپگان اِنت، وھدے ما کہ وتی ڈُبّہ ءُ زمہ واری ءِ پیلو کنگ ءَ آژنا بہ اِیں جھان ءِ ھچ زورمند ءُ تاگت مارا پد ءَ تیلانک دات نہ کنت۔ داں ما وت گُنگ ءُ بے توار مہ بہ اِیں، جھان ءِ زوراکیں واکدار مارا کدی گُٹگیر ءُ ایرموش کُرت نہ کن اَنت۔ اے بابت ءَ زانوگِریں نتشے (نطشے) جاھے گْوش اِیت: “اگاں تو جھان ءَ سُرینگ لوٹ ئے، اول چہ وتی جاہ ءَ بِہ سُر۔”
پمیشکا مارا اول وتی سر ءَ اْوست ءُ باور کنگی اِنت، ءُ مرچی ما پہ سِتک اے روچ (8 مارچ) ءِ بابت ءَ وت ءَ ھر سھت ءُ دمان ساجو بہ کن اِیں کہ مئے توان ءُ واک چہ ھچ کسے ءَ کم ءُ کمتر نہ اِنت۔ جھان ءَ کہ مردین آدمے ءَ گچینیں زند گْوازینگ ءِ ھکّ ءُ اُکبال، جھد ءُ سیاست کنگ، ایدگہ راجی دیمروئی ءُ گھبودی کارانی دیم ءَ برگ ءِ ھکّ ھست مارا ھم ھست، ما ھم ھمے رھبند ءُ کانود ءِ بھر اِیں، ما ھم وتی جھد ءِ رھسراں ھچ وڑیں زورانسری ودی کُرتگیں اڑانداں اُوپار نہ کن اِیں۔