پیش گال
اگاں مردم جھان ءِ دیمروئی کرتگیں راجاں بہ چار ایت گڑا اود ءَ شیزالیں زالبولانی یک مزنیں کردے گندگ بیت۔ راجانی تہ ءَ ھمے پیم ءَ مرد کار کرت کن اَنت زالبول ھم ھمے ھساب ءَ اَنت، زالبول پہ راجی دیمروئی ءُ گلزمین ءِ پاسبانی ءَ ھمک جاہ ءَ گوں وتی مردیناں ھمکوپگ ءُ ھمراہ اَنت۔ زالبول ءُ مردینانی کار کنگ ءِ ھساب ھما وڑ بیت کہ یک مردمے گوں دوئیں دستاں کار بہ کنت آئی کار چنچو گشاد بیت اگاں مردمے گوں یک دستے ءَ کار بہ کنت آئی کار چوں نزور گندگ بیت بلکل ھمے پیم ءَ اِنت۔
ھمے ھاتر ءَ نوآبادیاتی نزام ءِ تہ ءَ زالبول چہ مردین ءَ مدام کم گندگ بنت، گوں ایشی ءَ ھوار دگہ سکا بازیں پرک مھذب، وتساچیں دود ءُ ربیدگ ودی کنگ بیت ءُ راج پُرشت ءُ پروش ءِ آماچ کنگ بیت۔
گڑا پہ اے وڑیں پرک ءُ دوریانی ھلاس کنگ ءَ اولی چیز آ مردین ءُ زالبول ءِ میان ءَ پرک ءِ ھلاس کنگ اِنت۔ اگاں مردین ءُ زالبول ءِ میان ءَ ھمے پرک ھلاس بوت گڑا سکا بازیں چیز وت گیش ءُ گیوار بنت۔ بلوچ ءِ انوگیں تھریک وت ھمے چیز ءِ مسال اِنت کہ بلوچ ءِ سْیاست ءِ پڑ ءَ مردینانی ھمراھی ءَ بلوچ ءِ زالبول گون اَنت ءُ جھد کنگ ءَ اَنت گڑا بلوچ ءِ سْیاست ءَ چنچو دیمروئی کرتگ۔
اے وھد ءَ بلوچ سْیاست ءِ پڑ ءَ بلوچ زالبولانی کرد ایوک ءَ بلوچ راج ءِ تہ ءَ نہ بلکیں سرجمیں دنیا ءِ تہ ءَ منّگ بوگ ءَ اِنت۔ ایشی مسال ٹائم میگزین اِنت چہ جھان ءِ سد نامداریں مردمانی تہ ءَ بلوچ زالبولانی نام ھوار اَنت۔ بلوچ راج زندگیں راجانی تہ ءَ ھوار اِنت کہ آئی نوآبادیاتی نزام ھلاس کرتگ ءُ وتی زالبول سْیاست ءِ پڑ ءَ مردینانی ھمراھی ءَ زرتگ اَنت۔ اے پہ بلوچ راج ءَ شان ءِ گپے اِنت۔
دگہ گپے ایش اِنت کہ یک جنزے بندات بوت گڑا آ ھمنچو دیم ءَ روان کنت پہ آئی ءَ نوک نوکیں مردم ودی بوان کنت ءُ مردم شوکیں رنگے ءَ کار کن اَنت۔ گرانیں بار ھما مردمانی کوپگاں بیت کہ آ جنز ءَ بندات کن اَنت۔ جنز ءِ بندات کنوکیں مردم سکا باز جنجالانی دیمپان بنت۔
اگاں مردم بلوچ ءِ شیرزالیں زالبولانی بابت ءَ چار ایت گڑا چہ اے جنز ءَ پیش مارا بانڈی، گل بی بی، چھاگلی، مائی بیبو، سلتان ھاتون ءِ کرد گندگ ءَ کیت۔ بلوچ ءِ شیرزالاں گوست ءَ ھم کربانی داتگ بلے انوگیں جنز ءِ بابت ءَ چار ایت زالبولانی جنز ءِ سرچمگ لمہ ءِ وتن شھید بانک کریمہ اِنت۔ آئی ءَ سک باز کربانی داتگ ءُجنجالانی دیمپانی کرتگ ءُ دانکہ اے جنز پما سر بیتگ۔ بانک کریمہ چو بانڑی ءِ وڑ ءَ سلاہ نہ زرتگ ءُ جنگ نہ کرتگ آئی بلوچ ءِ زالبولان ءَ یک سْیاسی تاکتے داتگ اے سیاسی تاکت روچ پہ روچ پزور بوگ ءَ اِنت، اے سْیاسی راھبند پہ بلوچ ءِ زالبولاں مادنیں کشکے ءُ ھمک وھد ءَ بلوچ ءِ زالبولاں جھد ءِ سکین ءَ دنت ءُ آیانی رھشونی ءَ کنت۔
گڑا لمہ ءِ وتن بانک کریمہ ءِ وڑیں شیرزال تھنا یک روچے ءَ یاد کنگی نہ اَنت آ مارا گوں وتی دل ءُ ھیالاں ھمگرنچ کنگی اَنت۔ ھمےھاترا بلوچ وومن پورم ءَ پہ نمیرانیں لمہ ءِ وتن شھید بانک کریمہ ءِ یاد کنگ ءَ پروگرامانی درچے برجاہ داشتگ اَت۔ ھمے پروگراماں بانک کریمہ ءِ بابت ءَ بیتگیں ھمک گپ چہ توار بنداں ابید کتابی دروشم ءَ شمارا سر کنگ بوگ ءَ اِنت۔ ما چہ شما ھمے اوست ءَ دار ایں کہ شما پہ وتی راجی جنز ءِ مھکم کنگ ءَ وتی جنکیں زھگاں پہ راجی جنز ءَ بھر زورگ ءِ سکین ءَ دے اِت ءُ ھما واب کہ لمہ ءِ وتن شھید بانک کریمہ بلوچ ءُ آدگہ شھیداں دیستگ شما آ واب ءَ پیلو کن اِت۔
نمیرانیں بانک کریمہ بلوچ ءِ یات ءَ ڈاکٹر شلی بلوچ ءِ مارشت ،اے کتابک شمارا جہل ءَ داتگیں تند جاہ ءَ دست کپیت۔ منتوار
