گُل بلوچ
بلوچ زالبولانی کرد ھمینچو مزن اِنت کہ بُندپترءِ ھرچ تاکءَ گِندگ بیت ، بلوچ زالبولءِ ھمت ءُ بھادریءِ کسّہ ماں دپترءَ نکش اَنت بس مارا شوھاز کنگءُ وانگ لوٹ اَنت ۔ بلوچءِ سرزمینءَ انچیں شیرزالیں زالبول ودی کُتگ کہ آیانی دیمءَ مزن مزنیں شھسواراں اوں وتی سر جَھل کُتگ اَنت۔
بلوچءِ سرزمینءِ سرا بانڑی ءُ گُل بی بیءِ وڑیں شیرزالاں ساہ زُرتگ کہ آیانی تمردیءِ کسّہ دپترءَ نکش اَنت ءُ برطانیہءِ جنرل وت گُل بی بیءِ بابتءَ وتی کتابءِ تہ ءَنبشتہ کنت۔ جنرل ڈائر ءِ کتاب (The riders of sarhad)، گُل بیءِ سرا نبشتہ کنت کہ انچییں نہ تُرسیں زالے بوتگ وھدے کہ آئیءِ لوگ واجہ دستگیر کنگ بوت ءُ آئیءَ را پاھوءِ سزا رست۔گڑا آ وت جنرلءِ دپترءَ رؤت ءُ پہ مڑاہ اے گپءَ گو ش ایت کہ منی لوگ واجہءَ آجو بکن اِت کہ زوراور شُما اِت ءُ آئیءَ پہ وتی زمینءِ رکینگءِ واستہ جنگ کُتگ۔گڑا جنرلءَ وھدے کہ گُل بی بیءِ شیرزالی دیستگ ھبکہءُھیران بوتگ ءُ گل بی بی ءِ شرنگیءَ ھم گنوک بوتگ ءُ آئیءَ را princess of rose ءِ لقب ئِے داتگ ءُ آئیءِ لوگ واجہ ئِے اوں آجو کُتءُپدا گل بی بیءَ آئیءِ واستہ پسے پہ سوگات دیم داتگ۔
گل بی بیءِ دلیریءَ چہ بلوچءِ دپتر سمبھتگ، گوشگ بیت گل بی بی ءَ چار سردارءِ لشکرءِ کمانڈ گون بوتگ ءُ جنگءِ وھدءَ گُل بی بیءَایش کمانڈ کُتگ اَنت ءُ بازیں جنگاں وت ھم گون بوتگ ۔
اے چاریں سردارانی تہ ءَ یکے آئیءِ لوگ واجہ بوتگ سردار شھسوار خان، یکے سردار خلیل خان، سردار جُما خانءُ سردار جیھند خان، اے چاریں سردارانی چیف کمانڈر گُل بی بی بوتگ۔ گُل بی بی اسلءَ یک ڈاکٹرے ھم بوتگ ءُ آئیءِ کرا سد جنینانی یک ٹولی یے بوتگ کہ جنگءِ تہ ءَ ٹپّی ئیں سپائیانی الاج اِش کتگ، گُل بی بیءِ کرد بلوچءِ بندپترءَ سد سالءَ رند اوں زندگ اِنت۔
لسبیلہ ءَ یک جنین سردارے بوتگ کہ آئیءِ نام چاگلی بوتگ، اے بُلفُت قبیلہءِ سردار اَت، وھدے کہ آئیءِ مرد بیران بوت گڑا آئیءِ چُک کسان اَت گڑا پمیشکا لسبیلہءِ مستی ھمائیءَ زُرت ءُ وھدے کہ کتوریہ کھولءَ اُرش کُت گڑا چاگلی وت اَپسءَ سوار بوتگءُ وتی لشکرئِے کمانڈ کُتگ ءُ چہ وتی زمینءِ سرا چہ زوراور ئِے تاچینتگ اَنت۔ اے کھول پدا قلاتءَ شُت ءُ پناہ ئِے زُرت ءُ قلاتءَ آ وھدءَ میر محبت خانءِ زمانگ اَت گڑا ایشانی میانءَ ھمے سوڑگ بُوت کہ قلات مئے کُمکءَ بہ کنت کہ ما لسبیلہءَ فتح بہ کن ایں، محبت خانءَ ھمے شرت ایر کت کہ لسبیلہ فتح بیت گڑا نیم ملکیت تئی بیت ءُنیم منی،کتوریہ کھولءَاے شرت منّ اِت ءُ یک بلائیں لشکرے دیم پہ لسبیلہءِ نیمگءَ شُت، جنگ ئِے کُت، چاگلی ءَ آیانی گوماں جنگ کُت بلئے آیانی لشکر ھمینچو مزن اَت کہ چاگلیءَ لسبیلہ یلءَ دات ءُ سندءِ نیمگءَ شُت، بلوچءِ بُندپترءِ توکءَ چاگلی ءِ نام انگت ھست اِنت۔
بلوچءِ زالبول نہ تھنا جنگءَ گون بوتگ اَنت بلکیں آ لبزانکی پِڑءَ اوں گِندگ بوتگ اَنت کہ ھما زمانگءَ دگہ راجانی جنین پردہ ءَ بوتگ اَنت بلئے بلوچءِ زالبول شائر بوتگ اَنت ءُ آیانی شئیر دیواناں وانگ بوتگ اَنت، مھناز ، ھانی ، شیرین ءُ سیمکءِ نام مئے بُندپترءِ زیبءُزینت اَنت۔اے ھما زمانگ بوتگ کہ دنیاءِ بازیں چاگرد چہ لبزانکءَ نابلد بوتگ بلئے بلوچءِ زالبول شائر بوتگ اَنت۔ ایشاں انچیں شئیری چھرءُشبین گُشتگ کہ انگہ روچء مروچی ما بلوچ ھما چھرانکاں وتی شائریءِ تہ ءَکارمرز کن ایں۔
دادشاہ کہ آئیءَ مگرروکپتی بلوچستانءَ جنگ کتگ ءُآئیءِ گُھار کہ آئیءِ نام زینب اِنت ءُ بُن دپترءِ تاکاں آ خوارِ دادشاہ گُشگ بیت۔ زینب انچیں دلیریں زالے بوتگ وتی براتءِ ھمرائیءَ سنگر داشتگے ءُ جنگ ئِے کتگ، زینبءَ ھرچ جنگءَ وتی براتءِ ھمراداری کُتگ۔
ھمے وڑا میمہ جدگال ھم مگرروکپتی بلوچستانءَ یک کمانڈرے بوتگ کہ ھرچ جنگءَ سوبین بوتگ ءُ دژمنءَ آئیءِ دیمءَ داں دیراں اوشتات نہ کتگ۔
بلوچءِبُن دپتر چہ چُشیں شیرزالاں سرریچ اِنت کہ آیاں پہ اے زمینءِواستہ جنگ کتگ۔ھر پڑءَوتی ھیدریچیءُتمردی پیش داشتگ۔
بلے ایش مئے بدبنھتی اِنت کہ ما چہ وتی بُندپترءَ سستگیں ءُ بگندے کہ اے ایردستیءِ سبب اِنت مئے بُن دپتر چیر تراِتگ بلئے ما یک زالبولانی گلءِ بستارءَ اے نیمگءَوتی وانشتءَ مھکم بہ کن ایں۔ ھر ھما کسہءَ دیمءَ بیاریں کہ آ کسہءَ گوں ما ھمدپ اِنت، ھر ھما تمردءُدلیریں زلبولانی بابتءَ چہ آشنا بہ بیں کہ آ مئے سیاسی تربیتءِ وسیلہ بنت، بلوچ بُندپترءَ چشیں سدانی کساسءَ زالبول دست کپ ایت کہ آ مئے رھشونی ءَ کن اَنت، ھما تسلسلءِ مرچی لکیر کشگی اِنتءُتچک کنگی اِنت ءُما یک ساھتے ھم پراموش مہ بیں کہ ما اے راجءُزمینءِ پھازگءِڈبہءِ سوگند وارتگ۔
