ماں بلوچ راجمان ءَ دْرستاں گیش عزّت ءُ شرپ ءُ بستار زالبول ءَ دِیگ بوتگ کہ آ اِے راجمان ءِ مُچی ءُ ربیدگی رد ءَ بنجاہی کرد ءِ بستارءَ داریت
ڈاکٹر فاروق بلوچ
زالبول راجمانءِ اروہ اِنت کہ بیدء آئی ءَ بے شک نہ زندگی جوڑ بیت ءُ نیکہ اِے کازماس ءِ جوڑ کنوک ءِ مراد ءُ مقصد سرجم بیت کنت۔اگاں پہ انسانی ردوم ءَ خاندان ءَ چہ دْرستاں خاص ءُ بنیادی کردارے داریت گڑا خاندانءِ اسیلیں بنیاد گزار بس یک زالبولے بیت ءُ راجمان ءِ ھساب ءَ ھم گیش کنت بزاں چہ خاندان ءَ تمن ءُ چہ تمناں پدریچ ءُ تاں راج ءُ قوماں بدل کنت۔ بے شک زالبول ءِ ھمدردی چہ کوہ ءَ مستر بوت کنت ءُ آئی مہرءُ مہربانی ءَ چہ ھچ وڑیں پیمانہے ءَ کدّ ءُ ماپ کرت نہ کنیں۔ زالبول مات،گْوہار،لوگبانک،جنکءِ دْروشم ءَ ھاوند ءِ داتگیں سوگاتے ءُ ھما لوگ ءَ زالبول مہ بیت آ لوگ ویرانگے ءِ دْروشم ءَ بیت،تُری اودءَ دہ مرد بہ بیت بلئے آ گس بیرگءَ ھورک ءُ بے ڈول گندگءَکئیت ءُ اگاں سرجمیں راجمان ءَ زالبول ءِ زات ءَ در بہ کنئے داں زانگ بیت کہ آ راجمان ءِ روچ چنکس بنت۔ پمیشکہ اِے گْواچنءَ ڈالچار کرت نہ کنیں کہ زالبول پہ راجمانی زندءَ ھمنکدر الّم اِنت ھمنکس مردیں آدم الّمی اِنت۔ بلئے چوش دیست کنیں کہ دنیاءِ گیشتریں بہراں زالبولءَ را آ درجہ ،مقام،بستار ءُ ارزشت دِیگ نہ بیت ھما درجہءُ بستار کہ آئی ءَ کرزیت۔آئی ءَ نزور ءُ پْرشتگیں راجماناں سک جہل جنگ بیت ءُ گُڈّی درجہ دِیگ بیت۔اِے گپ ھم باور کنگی اِنت چُشیں مرتگیں راجمان ھم ھست کہ خاصیں تہواراں زالبول کربان کنگ بنت۔ گْراں مہذب دنیا ءِ بن دپترءَ چشیں بازیں زالبولءِ زکر ھم دست کپیت کہ آ ملکی ءُ میان اُستمانی سطح ءَ باز نامداربوتگ اَنت ءُ بندپترءِ تاکانی برْاہ بوتگ اَنت۔کْوہنیں مسوپوٹیمیا(عراق)،کْوہنیں مصر،کْوہنیں ہندوستان،کْوہنیں ایران،عربءُ ترک اسلامی دودمان بلکیں دنیاءِ ھر دودمانءَ زالبولءِ کرد گندگ بیت۔ البت اِے کْوہنین دودماناں ھم زالبولءِ زکر ناگتی گندگءَ کاینت۔
بلوچ راجمان ءَ زالبول مردین ءِ شرتریں ھمراہ زانگ بیت ءُ آمردءِ ھر سکّی ءُ سوری ءُ درد ءُ وشّی ءَ ھمگامی ءَ جنزیت ءُ گوں جذبگءُ ہمّتءَ مردءِ پجّیءَ اوشتیت۔ بلوچستانءِ کْوہنءُ نوکیں بندپتر ءِ تاک چہ زالبولءِ زکرءُ سپتءَ سرکَیل اَنت آیانی تہا شیرزالی ءُ نہ ترسیءِ ھمراہیءَ ایدگہ راجی ھزمت ، اگدہ زیری ءِبازیں نشانءُ درور گوں دلجمی ءَ دَیگ بوتگ اَنت ءُ گندگ بنت۔بے شک مرچی بلوچ راجمان ءِ بے گْوازءُ وسّاچیں پدمنتگی ءَ ابید دنیاءِ بازیں راجانی دیم پہ دیمءَ وتی جتائیں مزن مرّی گون اِنت ءُ اینکس سیاسی، زانشی، راجمانی ءُ انسانی آزادی کہ یک بلوچ زالبولےءَ را ماں بلوچ راجمانءَ رستگ اینچو باز مشکل اِنت کہ روکپتی دنیا ءَ ترا دست بہ کپیت۔جہلءِ رداں بلوچستانءِ دودمانی ءُ ربیدگی زندگیءِ جتائیں پلّواں زالبولءِ کردءُ عملءِ بارہ ءَ کسانیں دْروشمےءَ چمشانک دِیگ بوتگ۔
دلگوش اے نبشتانک بلوچ وومن فورم ءِ تاک “برمش” ءَ چہ زورگ بوتگ
جہل ءِ داتگیں لنک ءَ چہ شمارا سرجمیں نبشتانک پی ڈی ایف ءَ دست کپیت
